وجبت موبايل 6600

وأخيرا .. بعد رحلة طويلة بين الموبايلات

بداية من اريكسون 1018

ثم نوكيا 8200

ثم موتوريلا ( النجم )

و اخييييييرا

نوكيا 6600

ربنا يكرم ... مش عارف هيكون اللى بعده امتى .. بس شكله هيعمر معايا شوية .. ربنا يسهل

و حصل اللى الواحد كان خايف منه

وحدث ما كان المرء يخاف منه .. او لا يتوقع حدوثه .. على الأقل له بالذات

سيكون هذا البوست مقتطفات كده .. منها المفهوم .. ومنها من سأشفرها زى قنوات الart يعنى الى حد ما لم يحن وقتها بعد .. بس انا عايز اتكلم عنها و خلاص .. حاجات حصلتلى و حاجات حصلت لناس صحابى .. يعنى كوكتيل كده غريب .. ربنا يستر

..........

العشرة فعلا تكشف خبايا النفوس .. ليس فقط نفوس من حولنا ولكن نفسنا نحن أيضا .. أنت تجد تصرفات مختلفة عنك .. وتربية غير التى تربيت عليها .. و تفكير مش عايز أقول أقل أو أكبر بس خلينا نقول غير دماغك

المشكلة طبعا مش فى كده .. المشكلة فى محاولة فرض تفكير معين .. او تصرف على تصرفات الناس التانية .. هذه هى المشكلة الكبيرة فعلا .. و انا بالذات هذا الموضوع حساس معى .. انا لا أقبل و لا استسيغ اى فرض للاراء من أى شخص مهما كان .. اقتنع بالاقناع والافهام و محاولة اثبات الرأى و صحته فعلا

للأسف .. وأقول للأسف .. مع ان اى شخص مكانى كان زمانه مبسوط او الى حد ما فارد نفسه على أساس انه مسئول جناح لدار .. يعنى مسئول عن سدس شغل الدار فى المعرض .. و كمان فى نفس الوقت متحمل فلوس الصرف على الشقة التى يقطنها انا و اثنين معى .. عشاء وفطار و اللذى منه

الموضوع كان عادى جدا لغاية بداية المعرض مع انى معايا فى الشقة واحد اكبر منى فى السن ... و الحمدلله ما هواش من النوع الحساس وموضوع دا انا اكبر منه والكلام الحمصى ده .. كويس كده

مع بداية المعرض انضم لينا واحد جديد .. كان فى المعرض السنة اللى فاتت .. تانى يوم معانا لقيت الباشا ده ا بيقول يا جماعة احنا نجيب عشاء على قدنا و اللى يفضل من فلوس كل يوم بتوزع علينا كلنا بالتساوى

مش هقول صعقت و مسكت قلبى زى عماد حمدى .. لأ بكل تحضر و تمدن و عدم مبالاة .. بدأت اشرحله ان ده ما ينفعش .. و الراجل مستأمنا على فلوس مينفعش نستقطعه من وراه .. قاللى و الباقى من فلوس العشاء و الفطار هنعمل بيهم ايه .. رديت عليه : طبعا مش هحطهم فى جيبى .. هنقول لصاحب المكتبة باقى معانا كذا و يكمل على الفلوس دى وخلاص .. وزى ما نصرف فى الشقة براحتنا .. مش هنشحر العملية على نفسنا عشان 10 جنيه فى اليوم

انا قعدت اشرحله الكلام ده فى خلال ساعتين لغاية ما دماغى ورم .. هو قاعد اللى يقوله يعيده .. وانا دماغى ناشفة و رزل مصمم .. المهم اللى كان مطمنى ان صاحبى التانى اللى فى الشقة كان موافقنى على كلامى .. حتى لما كان هو بيكلمه من ورايا عشان يكلمنى .. يقوله هو مش راضيها خالص

المهم يوم ورا يوم هو رضى بالأمر الواقع مع الاقتناع الكامل بما قاله .. لغاية من 3 أيام لقيت صاحبنا التانى بيقول ده فى ناس بتعمل الموضوع ده فى شقة معينة .. وبدأ يرمى الموضوع ده على اساس انى افهم هو قصده ايه .. انا طبعا اتغابيت ( بحب انا اشوف نفسى وانا باين فى دور الغبى !! ) .. لغاية ما وصلنا الشقة و بدأ العصبية تفوح من الكلام .. وكلام من نوعية ماحدش احسن مننا .. و احنا برضه الفلوس دى احنا اولى بيها .. كلام من الملىء بالصحة و الخطأ فى نفس الوقت ... طبعا خلاص ماعدش فى مكان للتغابى اكتر من كده .. قولتله انت دلوقتى عايز ايه .. هو قال مش عايز حاجة بس ماحدش احسن من حد .. طبعا كان الكلام ده بدأ يخش فى نبرة الخناقة عارف انا الدخلات بتاعتها و مش على اخر الموضوع الواحد هيتشاكل عشان فلوس

قولتلوا بص الفلوس اه معاك .. اعمل اللى انت عايزه فيها .. بس ياريت ما تنسانيش وانت بتجيب العشاء .. و شيلونى من فلوس الشقة .. بس مش اكون انا اللى باخد الفلوس من الراجل و انا اللى بستهبل .. و اديتله الفلوس

لم نعد كما كنا من قبل .. انا متضايق منه لأنه كان هيتخانق عشان فلوس .. و هو متضايق فاكر انى بترسم و عامل فيها بتاع .. و بقى اقصى حاجة .. سلاموا عليكم و عليكم السلام .. جه الصبح بيقولى خد العشرة جنيه دى بتاعتك .. عشان كان عندنا اكل فى التلاجة من امبارح .. قولتلوا مش واخد حاجة .. قاللى يعنى ايه ؟ .. قولتلوا .. يعنى مش واخد حاجة .. انتوا حرين وانا حر .. انا شلت ايدى من الفلوس بتاعت الشقة ظبطوها انتوا براحتكوا .. بس ما تنسونيش من العشاء ... ما ردش طبعا عشان احنا قافلين مع بعض .. بس قال براحتك - ماهو طبعا براحتى امال براحة مين يعنى

............................

بونيون وشوكولاته و حاجات كده

دى كنت ناوى اتكلم فيها بس هحاول ختصر شوية و اشفرها حبتين .. احم احم .. برضه الكلام ده فى المعرض

يعنى منظره كان مستفزا فى الأول .. بس بدأ يلفت النظر اليه .. انت تحاول ان تعرفه .. و تكتشفه .. لا تستطيع او انك تخاف .. من اى شيىء لا تدرى .. تشترى علبة بونبون كاملة عشان تستطيع فى زحمة التوزيع على الناس ان تتعرف اليه .. وفى كل مره تخذل فى اخر لحظة وتقول غدا يوم اخر

وكل يوم علبة جديدة .. وخذلان جديد .. لاتعرف لماذا .. لكن هذا هو فقط الذى تقدر على فعله بدون احراج .. هتقول ما تكلمه و اتعرف عليه و خلصنا .. هقولك : وانا لو كنت استطيع كنت هعد اكلم كده

حدث اليوم احداث كثيرة فى هذا الموضوع .. لكن اوان نشرها لم يحن بعد .. وقد لا تنشر اصلا

بس كفايه كده .. هحاول اواصلكوا باخر الأخبار

سلام عليكم .. وغدا يوم اخر

انت ايه اللى جابك

بقية مجموعة خواطرى عن معرض الكتاب .. مباشر

و غدا يوم اخر
معكم انا اليوم لتكملة حديث الأمس .. الجو برررررررررررد .. و البنطلون و الجاكت اللى ناشرهم من امبارح زمانهم لسه ما نشفوش فى الجو الظريف ده
وصلنا لفين امبارح .. اه لغاية ما بدأنا الشغل الحقيقى فى المعرض .. طيب هو المعرض بدأ الشغل فعليا من 6 أيام بالظبط يعنى من يوم الخميس اللى فات .. بدأنا الشغل الحقيقى و بدأ الناس تدخل .. وزى ما قولت امبارح الجناح اللى احنا فيه احنا الثلاثة هو أصغر جناح بالنسبة لبقية اجنحة المكتبة
بدأت الملامح توضح و تظهر فى الساعات الأولى من اليوم و عرفنا أن جيراننا هم كالاتى
على يميننا .. شركة اسطوانات تعليمية و الناس اللى فيها زى حالاتنا جدعان و شكلهم الى حد ما على اد حالهم شوية .. يعنى مش شركة كبرى من بتوع مجلس ادارة الشركة و الهوليلية دى
على شمالنا .. شركة كبرى مشهورة لبيع الاجهزة الرقمية من أول ال mp3 الى اللابتوب مرورا بالكاميرات الديجيتال و البرينترات و الذى منه .. يعنى حاجة كده جامدة شوية .. كفاية بس ان الطفطف اللى فى المعرض تقريبا بتاعهم ... بدلو جرافتات و ايديهات و شغل يحسسك انك اتنقلت لخدمة عملاء فودافون ولا حاجة .. ييجى الزبون يخش يدخل عليه أصحابنا يقولوا له: ازاى حضرتك .. شركة ... عاملة عرض النهاردة .. و ويك ويك ويك ويك
و هما مقسمين نفسهم لخمسة و ثلاثة .. الخمسة كل مهمتهم شد الزبون و تجليسه ليعرف مزايا الجهاز او للتعاقد و الذى منه .. و الثلاثة هم الجالسين الذين يشرحون هذا للزبائن الذين رضوا و حبوا ان يغامروا رغم معرفتهم انهم (هيتخيطوا !! ) ..شوف البدل و كلمة حضرتك دى و انت هتعرف انت اد ايه تقريبا هتدفع
فى ادامنا دار نشر تركية .. موجود فيها شباب اتراك و اندونيسين وهم بيدرسوا فى مصر .. بس شباب جدعة .. رغم لغتهم العربية المتكسرة بس لو انت عايز تتفاهم مع حد هتعرف لو حتى بيكلم هندى .. خاصة انى كمان بحب تركيا جدا .. كبلد .. و كحضارة .. و كثقافة متعددة .. اتعرفت فيهم على و احد منهماسمه ابراهيم نور .. بقينا دلوقتى اصحاب و معانا نمر بعض كمان .. بس ولد جدع جدا
اين المشكلة الان
؟؟؟؟؟؟؟؟؟؟؟؟؟
كل دا كلام عادى بس فين القضية .. هى ايه الحاجة اللى مخليانى اكتب و ادخل سيبر مخصوص عشان اكتبه مش عايز استنى لغاية ما أرجع و بعدين اكتبه
صبرا .. واحدة واحدة .. اولا المشكلة مش متعلقة بي كشخص الحمدلله .. ثم غالبا لو كانت كذلك لم أكن سأذكرها او علىلا الأقل لن أفرد لها بوست كامل .. ده يبقى نرجسية عالية المستوى .. وتمحور تام حول الذات
ماعلينا .. الجناح بتاعنا اول ما اتفرش اتحط فيه و فقا لخطة المكتبة له .. كتب المجلدات .. الكتب الكبيرة اللى لا تقل عن 200 صفحة حاجة كده من اللى غاوى يقرا يموت فى هذا النوع من الكتب
و فى الاعتبار الدار عندنا ليها كتب كبيرة مجلدات زى ما قولتلكوا .. و كتب تانية صغيرة شوية يعنى من عيار 60 او سبعين ورقة بنسميها كتب غلاف .. و فى كتب كمان .. او على الاصح كتيبات اصغرمن كده كمان
بس الجناح عندنا كان مخطط له لبيع المجلدات فقط .. و كانت الكارثة
كارثة بمقاييسى انا على الأقل
لن تتصوروا اول يوم لنا فى الشغل و دخول الجماهير .. لن تتصوروا كيف كان جلوسنا هكذا و نحن فى انتظار الناس .. كان منظرا بديعا لن انساه طوال حياتى .. دخل عندنا ناس قليلين اللى اشترى منهم 2 فقط !!!! ... غير مصدقين طبعا .. هذا هو شعورى و الله مثلكم .. استغراب الى طول الحد .. و طبعا كان ايراد اليوم حاجة مزرية فعلا لن استطيع ان اصف كيف كان شعورى و انا اسلم ايراد اليوم لصاحب المكتبة .. هو طبعا مقدر و عارف ان الصالة عندنا مردومة و متقفلة من كل ناحية .. بس لم يكن يتصور ان تصل الى هذا النحو
كانت تلك الليلة من أصعب الليالى التى مرت عليا .. لا انكر انى تمنيت ان يتم وضعى فى هذه الصالة لأنها اصغر مكان و سيكون الموضوع تحت السيطرة تماما .. لكن شعورى بعد ذلك كان اقصاه ان يتم نقلى الى جناح اخر ذو ايراد عالى و ان لم يكن لى فيها دور كبير .. على الأقل لن أكون المسئول عن نجاحها أو فشلها
المهم انها كانت ليلة ليلاء فعلا .. لأن على الأقل اول محك لى مع الحياة المادية و البشرية فى طريقة الى الفشل و الانحدار
ذهبنا فى الصباح و عقلى يدور بلا توقف و كلى تفكير و تصور و استرجاع لحالتنا أمس .. هذا المنظر البائس الذى ظل يتأرجح أمام عينى طوال الليل
ظللنا حتى الظهر و زبون واحد فقط هو من اشترى منا .. و بدأ الكابوس يطرح عباءته علينا فعلا .. وبدأ القلق يساورنا وان لم نتكلم .. حمادة اللى ما بيبطلش ضحك بدأ يضحك بعصبية لو انتوا فاهمين ما اقصده
فجأة قفز حل ما الى عقلى .. وقلت لهذا الحل و لما لا .. و على الاقل يكون اول تطبيق عملى لى او استفادة عملية من علم النفس اللى انا وارم دماغى بيه
قلتهم ثوانى وراجع لكم تانى .. رحت للصالة المكشوفة .. الجناح الأم لنا فى المعرض و بدأت أجمع عدد 5 من الكتب الصغيرة التى لا يتعدى سعرها 2 جنيه و اقل كمان .. و التى اعرف انها تسحب بسرعة و الاقبال عليها سريع
و رجعت بغنيمتى بعد ما مليت كيسين كبار .. راجعا ارض المعركة .. هتف فى حمادة انت ايه اللى جايبه يابنى .. عندها بدأت أشرح له نظريتى
الانسان بطبيعته لا يحب ان يكون فى معادلة يكون هو واحد زائد صفر ولو حتى كان الناتج هو واحد .. لا الناس تحب ان تكون واحد زائد واحد .. او واحد زائد اتنين .. ويا حبذا لو واحد زائد خمسة
اعمل زحمة ادام مكان و انت هتلاقى كل الناس هتموت و تعرف ايه اللى خلى الناس اللى واقفة دى واقفة .. و عقلها الباطن يقول يعنى هما يفوزوا بالفرصة دى و انا لأ .. و يلعب حب الفضول و الاستطلاع دوره العتيد فى هذا الجذب .. و فى نفس الوقت سيأتى الناس المتخصصة الباحثة عن الكتب الكبيرة التى تروى ظمأها عندما ترى تجمع ناس فى مكان معين .. لأن عقلهم غير الناس الاخرين الا و هو الناس دى شكلها عندها كل حاجة و بأسعار كويسه بدليل الناس الموجودة دى
طبعا ما قولتش كل الكلام ده لحمادة .. بس قوقلتله نبذه مختصرة على غرار .. هتعمل جو جامد .. هتجيب لمة .. وخاصة انى كنت جبت خشبتين و اتكب عليها سعر الكتاب 2 جنيه
لكن أن تتخيل عدد الناس التى بدأت تشترى بدءا من اللحظة التى عملنا فيها تلك الحركة .. و كنت فى نهاية اليوم لولا الملامة لنزلت على كل كتاب من تلك الكتب و قبلتها و احدة واحدة
المؤسف فى هذا الأمر ان معظم مضامين الكتب هزيلة فعلا .. لا تسمن و لا تغنى من اى شيىء بتاتا .. انا نفسى لا ارضى ان اشترى منها واحدة لانى للاسف لست من هواة شراء اللب
عندما يكون انسياق الناس و تسابقها على شراء كتب الطرائف والطبخ و المسابقات اكثر من الكتب الحاملة الثقافة والمعرفة فهذه مشكلة فعلا
عندما يكون الانبهار بالكاميرا الجيدة افضل من الدهشة بوجود مؤلف رائع .. يكون فعلا شيئا مؤسف
عندما يكون حل الأديب او المؤلف او الكاتب لكى يصل الى الناس هو النزول تحت خاااااااااااالص لمستوى أقل الناس ليفوز برضى الغالبية العظمى من الناس .. لكن ان يبحث عن معانى كبيرة و اهداف اكبر و أفكار متحررة و جريئة قد لايسطتيع معظم الناس فهمها فهذا هو الشخص الذى يتسلى الناس بمعااقبته بعدم تعبيره او تجاهله ليس عن ترفع و لكن للاسف .. لكى يداروا عدم معرفتهم
ااالمنى كلمة قالها شخص من الاشخاص الذين يشدون الناس ليسمعوهم عرض اليوم فى شركة الأجهزة الرقمية الشهيرة اللى جنبنا : أى كتاب بجنيه .. انا اصلا بكره القراءة !!! هو قال الكلمة دى وانا معرفتش أرد عليه
طب ده أرد عليه أقول ايه ؟

انا و حمادة فى المعرض

ممكن تقولوا ده يوميات دار نشر فى معرض القاهرة الدولى للكتاب

ممكن تتكلموا عن ان ده شوية كلام وافراغ مكبوتات معينة و حاجات كده .. تقول قبل ما تقرأها ربنا يستر

ممكن تقولوا بعد م اتقرأوا الكلمة الشهيرة فى فيلم الرهينة .. ( انت ايه اللى جابك هنا ؟!!) ... ممكن

ممكن كل حاجة .. بس الحاجة الوحيدة الممكنة و الأكيدة .. انى هنا .. موجود .. لسه بقول و بتكلم وفيه حيل و اتريق

عموما مش هطول عليكم .. لأنى بجد فيه كلام كتير عايز اقوله و مش لاقى وقت فعلا عشان أبص حولى

انا دلوقتى فى مدينة نصر .. فى شقة فى المربع السكنى امام معرض الكتاب مباشرة

هذا المربع السكنى الهادىء .. اللطيف .. الظريف .. اللى العربيات بتكون واقفة فيه لغاية بعد الساعة 10 صباحا .. لو فاهمين قصدى .. واللى كل الشوارع فيه زى بعضها

اصلا المكتبة واخدة 3 شقق فى المكان ده .. بس الصراحة تقال ان الشقة اللى احنا واخدينها افضلهم فعلا .. ده بالنسبة لموضوع السكن

انا طبعا بذكر الكلام ده لأنى لم أتغيب عن بيتنا فترة أد المدة دى .. اسبوعين و اكتر يعنى كان اخرى يومين او 3 او حتى 5 ايام .. اللهم الأيام اللى الواحد كان بيطرد فيها من البيت بعد حوار لطيف مع الحاج فى البيت يعنى الى حد كبير تجربة جديدة .. بالنسبة لى على الأقل .. و كما قال فيليسوفى .. الانسان مركز الكون بالنسبة له هو نفسه

اول 3 أيام من وصولنا المعرض كانوا اصعب و اتعب و أكثر الايام اجهادا بالنسبة لنا و بالنسبة طبعا لكل الناشرين .. لأنك ستفرش الجناح الخاص بك بالكتب .. وتلك عملية يحسبه الظمان ماء فيراه جلمود صخر

اضف الى هذا انك مطالب بفرش عدد 6 أجنحة فى المعرض هم عدد الأجنحة الخاصة بالمكتبة متوزعين بين السرايات و الصالات المكشوفة

انتهينا من الفرش و بدء مرحلة توزيعنا على الأجنحة كل عدد حسب مساحة الجناح وأهميته .. ولكم ان تعلموا انى بدأت العمل منذ اشهر قليلة لتستطيعوا التخمين اين مكانى فى التوزيعة ... ايوه بالظبط كده فى اصغر جناح .. لأ وايه المسئول المالى بتاعه .. يافرحتى او ساعة ما اتقالى كده قلت ربنا يعدى الايام اللى جاية على خير

المهم فى الجناح اللى انا فيه .. و احد اسمه هانى .. وواحد تانى اسمه .. حمادة

حمادة ده بقى حكاية

حمادة ده بقى شخصية من الشخصيات اللى قلما تجدها فى هذا الزمان .. لطيف المعشر .. مرح جداااااااا .. لا يكف عن السخرية و الضحك و التريقة و فتح علاقات مع الناس سريعا .. غيرى خالص .. مبعرفش اكون علاقة مع شخص ما بسهولة .. يعنى بتبقى الحاجات دى مرتبطة بطريقة التربية و طريقة تفكيرك اصلا

انا بحب اخترع و ابتكر و عايز أجدد .. وهو بيموت فى الروتين الممتع الساخر .. شخصية دمها أخف من الهواء .. اكبر منى ب3 سنين و فرحه بعد المعرض ب 3 أيام بس ساعات بحس انه بيهزر حتى فى موضوع جوازه ده لولا انى شوفتها كان جابها مرة فى المكتبة وعرفها علينا

ماشى ياعم حمادة .. انا عارف ان احنا بنكمل بعض فى حاجات كتير جدا .. كنت اعرفه طبعا قبل المعرض بس العشرة بتكشف حاجات اكتر و اكتر .. على فكرة احنا الثلاثة اللى فى الجناح احنا فى الشقة مع بعض .. يعنى زى ما بيقولوا اكلين .. شاربين .. نايمين .. بيشتغلوا مع بعض

ييجى يصحينى الصبح ويشد المخدة من تحت راسى .. اروح حادف المخدة الصغيرة التانية فيه .. بعدين يروح المطبخ يحضر البيض المقلى و يجهز الترابيزة عقبال انا اولع البراد عشان الشاى او النسكافيه .. نتفرج على تمثيلية محمود ياسين ما نعرفش بتتكلم عن ايه لأن التلفزيون عندنا مافيهوش غير الاولى و التانية و قنوات النيل فقط

نخلص الفطار .. نجهز الشنطة و نحط فيها الجوانتيات و ورق خاص بيا .. ونخرج ..نوصل البوابة بتاعة الناشرين نوريهم التصريح و ندخل و كل يوم .. كل يوم لازم يفتشوا الشنطة عشان يكتشفوا الهروين و الكوكايين اللى بهربوا فى المعرض

ندخل على الصالة بتاعتنا

متأيالى كده انتوا عرفتوا الخط اليومى لينا .. تقريبا

لكن ما ذا يحدث بعد ذلك .. و ماذا يجرى عند بدء دخول الجماهير

وماذا يكون شعورك عندما تكون فى معرض للكتاب و على يمينك بائعين للسيديهات .. و على شمالك بائعين للأجهزة الرقمية .. و أمامك عارضين لمشروع اسمع ابجد

طيب ايه شعورك لما يكون مثلا سعر ما تبيع به فى اليوم الكامل هو ثمن جهاز و احد صغير من الأجهزة الرقمية عند جيراننا

و ماذا يكون شعورك و انت ترى اقبال الناس على الكتب البسيطة و السهلة .. و عدم بذل عناء المشقة حتى فى القراءة فقط .. سيبك من السعر او حجم الكتاب .. انا مثلا عندى كتاب عن حياة جمال الافغانى كاتبه محمد عبده .. كتاب صغير جدا اد قصص نبيل فاروق القديمة ..المشكلة مش فى الحجم اكتر منه فى معرفة الكتاب المهم و تمييزه عن الغث

ماذا يكون

!!!!!!!!!!!!!!!!!!

لكن - كما يقول أحمد خالد توفيق - لهذا قصة أخرى

زورونى فى معرض الكتاب

صالة 2 .. أول ما تخش من بوابة الصالة .. من ناحية صالة 3

مكتبة الايمان للنشرو التوزيع - المنصورة

بجد المعرض غر يب .. وفى نفس الوقت جميل

فى انتظاركم

وأخيرا فى معرض الكتاب قبل ما يبدأ

!!!!!!!!

هل جربت من قبل ان تدخل كواليس مسرح المسرحية التى تعشقها وتهواها

هل دخلت مرة استديو تسجيل أغانى قبل التسجيل و تشهد بروفات المطرب

هل كنت مع المدرس فى غرفته و هو يرشف الشاى و يكتب الامتحان للطلبة غدا

لن أتذاكى عليك .. او أحسسك بالعجز .. او بأنك لم تفعل م ايجب فعله .. فهناك مقولة لشكسبير يقول فيها ان المشاهد يعجب بالمسرحية أثناء عرضها أمامه .. لكن لو فكر و جرب الدخول و كشف الستار عن الكواليس الحقيقية للعرض ليجد أن الدجاجة التى كان يأكلها البطل هى مصنوعة من الجبس !! و ان التليفون التى تكلمت منه البطلة تليفون لعبة !!! و غيره و غيره .. هل سيكون عندها فرحته لرؤية المسرحية مثل قبل أن يرى ما وراء الستار

لن أدخلكم فى متاهات فلسفية رخمة انا نفسى ما بحبهاش .. لكن تعمل ايه من حب الاستطراد فى الكلام .. غية معلش

لأنى بجد فرحان انى هنا
اتحدث اليكم من مدينة نصر بجوار أرض المعارض .. معرض القاهرة الدولى للكتاب

فرحان لأن انا كل سنة باجى المعرض بس كزائر .. بس السنة دى داخله كفرد من أسرة المكتبات الموجودة فيه ..

مبسوط لأن الناس اللى هتعامل معاها مش أى حد .. الشخص اللى اخل يشترى كتاب ده او على الأقل يتنفس هواء الكتب هو انسان احترمه جدا

صحيح انا بشتغل الفترة دى فى انتظار الجيش .. لكن أن تقضى اى فترة من عمرك مع شيىء لاتحبه حتى و لو كنت ناوى مش هتشتغل فيه بعد كده .. فانا بعتبره يعنى نوع من تضييع الوقت

اسبوعين هرس و عجن و طحن .. عرق فى عز البرد .. و تعب يقطم الوسط .. و لذة عن الرؤية النهائية للعمل

مش عارف .. المعرض لغاية دلوقتى شكلة ما اكتملش لسه .. لسه الاضاءات بتظبط .. و الأراضى بيتركب عليها حجارة جديدة .. مش عارف الكلام ده هيخلص قبل افتتاح المعرض الخميس أو الجمعة

عموما .. ربنا يكرم و يسهل

يدوب دلوقتى بقى أروح - لأنى بكلم من سيبر -عشان الناس اللى معايا فى الشقة اللى احنا قاعدين يكونوا لسه صاحيين و يفتحولى .. هحاول من حين لاخر اوافيكم بالأخبار .. أراكم على خير

من أنبائها

يوتوبيا ... تها

و دخلت مدونة أخرى

وجدت هذا البوست من مدونة utopiadream لصاحبتها نيرة الشريف .. كان بوستا .. خفيفا ... غريبا .. ذكيا .. عجيب ... و فريد الى حد كبير

أعلم ان 80 فى المائة من البشر يحلمون بالدنيا المثالية و النموذجية أو مايسمى باليوتوبيا التى أخرجها أفلاطون فى ابدع صورها و زخرفها و .. حلمها

أتصور ان الاتفاق على حلم اليوتوبيا دائما - ولنكن متفائلين و نقل غالبا -يصطدم بالواقع و مع الناس الذى ترتبت حياتهم على بعض من الغش والخداع و التحايل ليأكلوا فى اركان اليوتوبيا دائما نظير الحصول على منفعة موقته او عاجلة

لكن أن يكتم هذا الحلم فى أعماق الصدور خافيا نفسه عن الاظهار خوفا عليه من التكسر على صخور الخارج .. و الحفاظ عليه دون خدش له ليثبت هل هو متماسك ام هو لم يكتمل بناءه وترسخه فى اعماق النفس .. فهذا أمر غريب او انه على أحسن التقادير سوف يسبب متاعب نفسية لان الناس لا يفهموننى ..و يظنوا كتمانى له رغم ظهور الخطأ المصطدم هو نوع من السلبية

" أنا بقيت بخاف على نفسى أوووووى من كل شىء فى الدنيا ... أنا بريئه زيادة عن اللزوم وهو ليس مدح ولكنه ذم بكل ما تحمله الكلمة من معانى وفقا لكل المعايير الحياتية الحالية بس أنا نفسى أقابل ربنا كده ... نفسى أقابله كده وحاسة إن ده صعب أوووووى .. "

انا أوافقك فى هذه الجملة .. بس نفسى الحالة دى تكون على طول .. الواحد كان بيحسها فى رمضان و اواخره .. بس فى أيام تانية .. ربى أغفر لى

" ساعات بحس إنى عايزه أقفل على نفسى باب اوضتى وماشوفش حد مش عايزه أعرف معانى للغدر والخيانة والقسوة والغباء ومقاييس المصلحة الذاتية عايزاهم يفضلوا معانى بعييييييدة ومصطلحات أسمعها من بعيد فقط دون أن تقترب منى أو تلمسنى مش عايزه أحقد على حد ومش عايزه حد يكرهنى ومش عايزه حد يقسى علىّ لأنها بتبقى كبيرة وصعبة أوى عليا - حتى لو كان بينا ما صنعه الحداد - لأنى مش بقدر أقسى ... مش عايزه أكدب ولا أنافق ولا أخدع "

و هنا مكان اعتراضى .. ليه الناس اللى بتغلط و مش بتعمل الصح و هى عارفه كده .. ليه صوتهم عالى و لهم ألف تبرير و تبرير .. وليه الناس التانية اللى متأكده ان اللى بتعمله صح بتخاف على نفسها و بتخاف من الناس و أفعالهم

سيدنا الحسين رفع بدمائة الذكية راية ان الذى أراه صحيحا يبذل من أجله كل شيىء ولو كان كل من حولى خطأ .. شرط ان اكون متأكد ان ماأفعله صحيحا

بوست رائع .. و مدونة شيقة

عندما تريد ولا تستطيع

هل واجهتك هذه المشكلة الأزلية يوما ما

فكرت فى موضوع ما و أوجدت له حلا خالصا من قريحتك لكن كانت الحلول الخارجية الجاهزة هى التى تنتظرك لمناقشتها فى الموضوع لكى تلقى لك بالحل المصحوب بالدعم و المباركة و الدعاء بالتوفيق

هل ترددت عندها و شككت فى قدراتك فى التفكير .. و فكرت فعلا انه لا طائل ولا فائدة من حل مشاكلك بنفسك .. وتخطيط حياتك بمفردك .. لست أقصد التفرد كأنك نبى يوحى له .. لكن أقصد هذا الاحترام و اشعارك ان رأيك موضع فى الاعتبار .. وأنه فى الأول و الاخر هى حياتك ولا احد سيشاركك اياها .. الا انت نفسك

يقول فيلسوف ما .. لقد ولدت وحيدا وستموت وحيدا .. فالأفضل لك ان تكون معيشتك فى هذه الدنيا متفردا .. ده رأيه

نفسك تعمل حاجة .. ونفسك تبطل حاجة تانية

نفسك تدرس مجال تانى غير اللى تنسيق بعتك فيه .. يا عمى والله عارف انى قعدت 4 سنين فى أم الكلية دى .. طب وأنا مال أهلى .. هى عشان قعدت فيها فترة من عمرى لازم عمرى كله يرتبط بيها ..

قلتلك 300 مرة بكرهها مش عايز تفهم ليه .. يعنى عشان خطبت واحدة و ماعجبتنيش يبقى عشان الفترة اللى خطبتها ما تضيعش هدر يبقى لازم أجوزها

منطق غريب .. بس الحل التانى و هو انك تنفذ الحلول الخارجية الجاهزة ستلقى بالدعم و المباركة و الدعاء بالتوفيق.. وماعاداه فأنت لك دماغك المستقلة و ابقى ورينى بقى هتنفذ اللى انت عايزه ازاى

ومش بقى كده وبس .. لأ الاستغلال ال .... لكل فرصة للسخرية و التهكم و تيأييسك من حلمك المشروع .. فتجد نفسك فى فترة ما مثل حال حزب التجمع.. ربنا يشفى الناس اللى فيه .. مجرد أفكار .. لكن تنفيذ ابقى قابلنى

هل سيأتى اليوم الذى تتحقق فيه حلمك ببعض من اليسر .. وبدون أن تشعر أنك غريب عن هذا العالم و عن كائناته التى من أبسط حقوقها هى الحلم و ارادة العيش وفق ما يريد فكريا

!!!!!!!!!!!!!!!!!!!!!!!!!!!!!!!!!

حاسس ان ده هيتحقق فى مكان واحد بس

عارفين فين

فى الحلم

اتجمعوا العشاق في سجن القلعة ... اتجمعوا العشاق في باب الخلق
و الشمس غنوة من الزنازن طالعة .. و مصر غنوة مفرعة في الحلق
تجمعوا العشاق بالزنزانة .... مهما يطول السجن مهما القهر

انه هذا الارتباط الايدولوجى عندما ينزل الى أرض الواقع من مرتفعات العقل ..ولماذا ينزل انه قد يكون السبب فى الصعود السريع و التحليق الى افاق أبعد

ألف مبرووووك ابراهيم الهضيبى & خديجة حسن مالك

كل عام وأنتم أفضل من سابقه فكرا .. و عقلا .. وأكلا برضه

بس سؤال محرج .. انتوا اختوا عيدية كام ؟؟

اااااه يا ظرافة يا مستحملة

صورة غريبة و فريدة و نادرة وصعبة أن تكون حقيقية .. نعم أتفق معك فى هذا الرأى لكن فى عالم الحيوان فقط

ان كل حياتنا البشرية لا تخلو من تلك التركيبة الصعبة التى تراها فى هذه الصورة .. أناس تعبانين و شقيانين و طافحين القوته ولكن ايدهم و الأرض .. وناس تانية عايشين على قفا عرقهم و تعبهم و جهدهم لا لشيىء سوى أنهم لهم واسطة او مسنودين .. متظبطين من الاخر

فى واحد كان بيقول ( وانا مش موافقه على كل كلامه ) المجتمع زى الرصيف " وسخ "عايز يتكنس .. ناس بتعرق عشان لقمة العيش و ناس يعرق من التنس

مش عايز الموضوع يطفح اشتراكية او تحيز للبلورتاريا ضد الطبقة البرجوازية الرأسمالية العفنة - كما يحلو لبعض الرفاق تسميتها - لكن هناك الحد الادنى من العدل الاجتماعى و المساواة بالمثل و هو أصل اسلامى

لانها مأساة موظفى الضرائب العقارية الصامدين .. الرجالة بجد

أدرى ماهية أو نوعية أو وسيلة دعمهم و التضامن معهم بطريقة معينة .. ان حدث تدخل من جماعة للدعم او تضامن من حزب او حركة سيكون النتيجة هى فض الاعتصام بالقوة لأنها الان اصبحت اعتصام معارضى الحكومة وليس من أعماق الموظفين نفسهم

وفى نفس الوقت هذا من وجهة نظرى يعتبر جزء من سلبية شعبنا العتيدة التى تهوى مصمصة الشفاة و مجرد الدعاء لهم و كفى دون اتخاذ أى موقف جدى او عملى لهم .. صراحة لست أدرى الكيفية لمساندتهم .. لكن عزاؤنا الوحيد أنهم منا و يقفون الموقف الذى طال انتظارنا له ضد الفساد المنظم .. انها دفقة من الأمل اننا لم نمت بعد .. و اننا مازال فينا بعض من الدم و الشعور القهر بل و التعبير عنه

هنيئا لهم رجولتهم و حميتهم .. و نأمل أن يكون هناك طريقة لمساندتهم .. ومساندة نفسنا

نـــــــــــادى الـــــــراشــــــــــــدين

كان أمس ال 29 من نوفمبر من أهم الأيام الهامة بالنسبة لى

لم أعتد على الفرحة او الاحتفال بيوم ميلادى فلست شخصية تاريخية او سياسية او ثقافية هامة حتى لا يمر يوم مولدى ببساطة .. لقد كان يمر أحيانا هذا اليوم دون أذكره الا بعد مرور اسبوعين أو اكثر

ولكن هذا العام تذكرته فعلا و عشته طوال اليوم .. هذا لأنى اليوم أصبح عندى 21 سنة

و انتقلت قانونا من مرحلة العبث و اللا مسئولية الى سن الرشد .. اى أصبحت مسئول عن كل تصرفاتى و أفعالى و سلوكى

انتقلت عمريا و نفسيا من مرحلة المراهقة الى سن النضج .. رغم خطواتى منذ 3 سنوات للوصول الى النضج المعنوى

لست أدرى هل كان من المفترض أن اكون سعيد و مرح لأنى أصبحت 21 سنة أم امتلأ بالغم و الهم لانى فجأة ارتميت على الطريق وحيدا و على ان أتحمله بمفردى فلقد أصبحت كبيرا

لقد ابتلعت ريقى أمس بعنف وأنا أطالع مقدمة فى كتاب يتكلم فى علم النفس و كان يذكر مراحل الانسان العمرية ..

وكانت الجنين ..فى بطن الأم

المهد .. الى سن 2

الطفولة .. من 2-13

المراهقة .. من 13-21

سن الرشد .. من 21 - 40

الكهولة .. من 40 - 60

الشيخوخة .. من 60-70

الهرم .. من 70 لما فوق .. وربنا يديلة طولة العمر

عندما تصحو لتجد نفسك من المفروض أن تتعامل بطريقة معينة لأنك قد كبرت

عندما تجد أن واجبات فرضت عليك أخيرا لأنك قد كبرت

عندما يجب عليك عدم البقاء فى المنزل و ان تنزل للشارع للعمل لأنك قد كبرت

عندها

ارحب بك .. اهلا بك فى نادى الراشدين .. الذين قد لا يصبحون راشدين فيما بعد

عن ضيق الأفق أتكلم

فكرت كثيرا قبل كتابة هذا البوست .. حاجة غريبة بجد ومدهشة صحيح ومثيرة للاعجاب القدرة المدهشة التى يتمتع بها هؤلاء الاشخاص وهم يكتمون على الافكار الابداعية لمجرد أنهم لم يفعلوها هم من قبلهم وربما لم يكن أبائهم يفعلونها

قدرة غريبة على التشبث بأهداب الرسوخ و محاولة اشعار النفس انها هى الاصل و الباقى كله تقليد .. أن جيله هو الذى تعب و لم يهنىء وأن الاجيال الموجودة الان هى المرفهة و التى تحاول ايجاد الراحة من أى ثغرة

محاولة اشعار الذات انهم هم من يمتلكون الحقيقة المطلقة التى لاغبار عليها .. و ان ما عدا هذا هو الخطأ البين و الفادح الذى لا جزاء يساوى لما حدث

سأحكى لكم عن مثال بسيط لكل ما أريد قوله هذا اليوم فى هذا الموضوع .. أعرف صديق لى هو صغير الى حد ما 1 اعدادى .. المهم فى يوم قابلته و بدات فى التحدث معه و يحكى لى وفى غمرة ما أنا أتكلم اذ لاحظت ان يده و ابهامه وسبابته (صوابعه يعنى ) يلفهم بشاش و رباط ضاغط .. المهم سألته عن ما به .. فأخبرنى على انه وقع على الأرض و (جزعت ) يده بضم الجيم

وأخبرنى انه لا يستطيع الان الكتابة فى المدرسة لا فى الحصة ولا حل الواجب .. و طبعا زعيق الاساتذه غير متوقف

ألمت جدا لما يعانيه خاصة أن ليس له ذنب فيما حدث له .. بدأت أفكر معه فى حل لهذه المشكلة .. حل كنت أخترعته لزوم الفهلوة و ترويح الدماغ و انا فى 3 اعدادى .. كنت أتى بكربون و أجلس فى نهاية الصف بجانب صديق لى بحيث لا يرانى الاستاذ و انا أفعل ما أفعله .. و اعطى لصديقى الكربون و كراستى فيكتب هو عادى ما يكتب فى كراسته و كراستى و الكربون تحت كراسته فتطبع عليها .. وهذا أكتب دون أن أكتب

طبعا نيتنى كانت غلط .. بس افتكرت الموقف ده و قلتله عليه و اشتريت له حتى الكربون عشان اضمن انه هيعمل اللى قولت له عليه وانتظرت النتيجة

بعد يومين اتصلت بيه بطمن عليه وسألته عمل ايه فى الموضوع اللى اتكلمنا فيه (موضوع الكربون ) قاللى مانفعش !!! ليه يا بنى ؟؟ قاللى بكل براءة وبدون أى ضغائن فعلا .. مافيش أستاذ عندنا رضوا .. قولتوا ليه برضه .. قاللى هما قالولى لأ و خلاص ما ينفعش من غير ما يقولوا ليه

انا طبعا ما قدرتش اقول له حاجة .. لأن لو فى ذرة ذكاء من واحد فى الاساتذه كان زمانه فكر انه ما لايدرك كله لا يترك كله .. الراجل هيكتب الحصة كده و كده .. طيب ماشى بس مش هيلاقى الواجب حد هيحلهوله كده !! ده طبعا حاجة أكيدة لو كان فى من الذكاء بقية

او من عدم تضييق الأفق

قال شخص ما لا أعرفه .. انا أكره ضيق الأفق أكثر من الخطيئة

عييييييييييد سعييييييييييييييييد

البوست ده تقليدى شوية .. بس لازم وواجب لابد منه

كل عام وانت بخير .. وان شاء الله العيد الجاى يكون أحسن من العيد ده

أتمنى أن يكون العيد ده متنفس و راحة للمكبوت و المستغرق حتى النخاع فى مستنقع الحياة الدوامية

عيد سعيد ان شاء الله و يكون خير ما فيه هى السعادة المفتقدة المشبوبة بالشوق و المناسبة الدينية العظيمة التى غالبا ما تفسدها نزعاتنا الانانية

عيد اتمنى - انا - ان ارى ما فيه ما لم أره فى الأعياد السابقة .. لا ادرى كيف و لكن يتبقى لى حق التمنى و المحاولة وليس على ادراك النجاح

سأحاول بكل طاقتى ان اخترق المجهول و الغير معلوم بالنسبة لى و تجربة الترحال نحو الجذور و الأصول .. اصولنا

أتمنى لكم الخير و السعادة و القدرة على ارسال ال sms الكثيرة للأصدقاء و الأحباب و الأقارب الذين لا نراهم الا كل عيد

و معى عيديتى الخاصة لكم من تمثيل و اخراج فريق معا و .... أنا

وفريق معا ده مكون من مجموعة من شباب 3 أعدادى و فيهم واحد 2 ثانوى .. بس بجد دماغهم تعجبك .. وتحس كأنك مع أصحابك

بس ما تخدوش فى نفسكوا مقلب - الكلام ده للفريق

أعرف انها ستثير مكبوتات الفرحة و الشوق الى قلوبكم مشوبة ببعض الضحك اللطيف

مع تحياتى .. عطالله النديم .. وفريق معا

sa7e7 hena wala henak?

awel mara a3mel post ma7'sos le o3alek 3al post modawna o7'ra .. wa laken fe3la post yasta7ek an yakon al ta3lek 3aleyhe pe post kamek ..
haza al post men moadwanet "I`m Your Mind" lesa7batha roz wa m.osama .. begad tafker akal an yosef anho akbar men el sen al mar7aly lahom ..
lakm 7'ales e7teramy wa takdery al shaded ..
awel 7aga mawodo3 en el shabab ka7yan we dema3'oh fe el betngan dah mesh men sabab bas el 7okoma ro3'm korhy leom el 7okoma deh -lamo2a7'za - bas el asbab mogtam3a we morakba we akbar 3ela homa el shabab nafsohom we eradthom el 3ateda fe el bakaa fe el moraba3 el sahl we ely mafehosh waga3 dema3' ra3'm enoh el sa7 .. eradthom fe enhom ye2doha we ye3esho el yom beyomh bedon tafker fe bokra .. 7aga bardo sa3ba en el 3'albya el 3ozma betfaka behaza el tafker el estshaly ..
ana mosh asdy a3akd el donia we a2ol enha lazem tet3ash beldera3 bedon ra7a aw mot3 .. bas en kol 7aytna tet7awel lekeda bas fa dah el mesh ma3kol we mosta7el fe3la en el 7ayah tefdal beh we en el balad deh hay7sal feha nahda we takadom fe3ly ..
ana 3ala fekra el shahr el gay hatem 21 sana ..ya3ny manesh lesa law fahmen ana ased a2ol eh ..
3ozra le aletala .. we bel nesba lemawodo3 nefdal hena wala nero7 henk .. ana ho2olak 3ala 7aga .. law le2et fe nafsak el kodra we elesteta3ah enk tekon henak we tesbt nafsak henak fhonak how afdal makan lak 3ala wagh albaseta ..
we momken a2olak 3ala tare2a momken tesa3dek fel 7ekayet takrer el mawdo3 dah .. 7awel teb3d 3an el bet fatra esbo3en shhr we shof ba3d el moda de enta fe3la kader an tazel honak don ay ta2seer 3ala sha7'seytak wa a7'lakak wa 3adatak wa be el 3aks kant sabab mobasher fe el nohod benafsak wa an taste3 fe3la an toftam 3an walldeyak madia wa nafsia ..
gareb wa satokon alnatega heya al faysal bayen an tabka hon wa an tazhab honak
fe el nehaya .. awad an a3tazer besheda 3an 3adm este7'damy al lo3'a al3arabeya .. laken lezorof keybordeya 7'asa geda ..
mara saneya lakom 7'ales e7teramy